馬明：拍劇冇影響籌備婚禮

    前日，TVB新劇《飛常日誌》在機場舉行開鏡拜神儀式，劇中演員馬國明、陳豪、蔡思貝、高海寧、洪永城、劉穎鏇及戴祖儀等齊齊亮相。有指無線急召馬國明拍劇，影響他與湯洛雯的婚期，他強調婚期沒有受影響：“唔知係咪急召，因為套劇得十集，所有嘢如常，婚禮籌備中，冇受影響。”年底與湯洛雯結婚的馬明，之前一直忙於工作，婚禮的事多交由未婚妻負責，他透露劇集拍攝期間會到外地影結婚相，又自爆經常被訓話：“要等阿湯批准我先講得，因為佢想保持神秘感，我唔可以再講多啲，（有咩係你自己可以決定？）我可以決定自己套禮服。”

    跟靚湯份屬好友的思貝，很替好友開心。被問到是否已經到收囍帖和會做姊妹，她則未有透露，說要問靚湯。馬明說跟思貝還是首次正式合作拍劇，思貝飾演他的前妻，但他仍對對方念念不忘。二人可有親熱戲？馬明說：“劇本暫時未有激烈親熱戲，但有甜蜜回憶畫面。”談到有網民稱不喜歡思貝演出新劇《你好，我的大夫》，她沒有太大反應：“都唔係第一日嘅事，冇乜所謂，大家鍾意睇就繼續睇。”馬明就幫口說：“每個演員都有人鍾意同唔鍾意睇，做好自己就得，《你好，我的大夫》收視都好好，有好多觀眾都鍾意睇思貝，我都有睇。”